ما فيش حاجة
ما نيش محتاجة أنا لحاجة
و لا عايزة خلاص حاجة
و لو طمعانة أنا ف حاجة
ما خلتوليش و لا حاجة
عموماً بصوا فيه حاجة
حقولها بس محتاجة
عقول تفهم و لو حاجة
ماهيش مفهومة أو حاجة
نفسرها بكام حاجة
نوضحها بكام حاجة
و اهي حاجة مع حاجة
حتظهر و تبان لنا حاجة
و أنا .... ما بخافشي من حاجة
مانيش مسنودة و لا حاجة
لكن مابخافشي من حاجة
و أساساً مش حقول حاجة
لكن فرضاً لو حقول حاجة
حيحصل أيه؟؟ و لا حاجة
حيعملوا أيه؟؟ و لا حاجة
و بعد الشر لو واحد من السامعين
من الضالين فهم حاجة
حيعملوا أيه؟؟ و لا حاجة
فنتو كل علي الستار
لوجه الله نقول حاجة
فيه ناس بتعيش عشان حاجة
و ناس بتموت عشان حاجة
و ناس بتموت علي الحاجة
و ناس تديلك عشان حاجة
و تبقي عليها محتاجة
و ناس تديلك الحاجة
تاخد قدمها ميت حاجة
و ناس تكبر تكون حاجة
و ناس تصغر عشان حاجة
و ناس منظر و مش حاجة
و ناس تحلم بحلم بسيط
و تصحي و ما تلقيش حاجة
و ناس تنهب في خلق الله
و لا حدش يقول حاجة
و تلقي كبير حرس و نفير
عليه منظر و هو جبان
و شيخ منصر و لا حدش يقول حاجة
كلامي يا خلق فيه حاجة
لحد دلوقتي في حاجة
كلام عادي و بسيط جداً
و لا فهمشي و لا حاجة
ما أنا مقدرش أقول حاجة
صحيح نفسي أقول حاجة و ميت حاجة
لكن مش قادرة أقول حاجة
لأني لو حقول حاجة
حيجي ناس بتوع حاجة
و ياخدوني علي الحاجة
و يمكن أروح ورا الحاجة
و هوه لو سمع حاجة
حيعملوها لي ميت حاجة
عموماً بصوا لو واحد من القاعدين
عايزني أبلغه حاجة
يقول مايخفش من حاجة
نعم فيه إيه؟؟
لا..لا..لا..لا
لا فيه سرقة و لا تهليب
و لا تهريب و لا تخريب و لا حاجة
و بتقول أيه؟؟
و حامي أيه؟؟ حرامي أيه؟؟؟
و هربوا أيه و غرقوا أيه
و خصخصوا أيه
و مصمصوا أيه
و خلصوا أيه
شفافية مافيش حاجة
و بتقول إيه
وظايف أيه و قوانين إيه
و دستور إيه و هببوا إيه
و لخبطوا إيه
ده كله كلام مافيش حاجة
و بتقول إيه؟؟
لا..لا..لا..لأ عيب
لا فيه ترقيص و تدليس
و لا تدبيس و لا تهجيص
و لا حاجة
سمع مع هوس
أنا حاسة إن فيه حاجة
دقيقة سكات
لتبقي حداد
أنا حاسة إن فيه حاجة
زمانكوا يا خلق فيه حاجة
و لازمه كام و ميت حاجة
ده لو كان يعني فيه حاجة
أنا عن نفسي
مش حاسة و لا بحاجة
و لا متضايقة و لا حاجة
سعادتك برضه مش زيي
مافيش حاجة
جنابك برضه مش زيه ما فيش حاجة
ما أنا قلت لكوا من الأول
ما فيش حاجة
عليه النعمة يا أخوانا
ما فيش حاجة
و رحمة أبويا و يا أبوك
علي اللي جابوك
مافيه حاجة
و عهد الله و عهد الله
ما خلولنا و لا حاجة
و بقولك إيه؟؟؟
خلاص خلص
و فركش يلا يا أخوانا
ما فيــ يــ يــ ش حاجة !!!!

ميزو مفهمتش انا ولا حاجه هههههههههه
بهزر طبعا
جميله ولذيذه تسلمى^_^

مرسي يالولو ياعسل علي المرور